Nytt frå DNV-P

Me er nett ferdige med Veterinærdagane på Hamar. Der var heile styret samla til styremøte. I tillegg hadde me ansvaret for litt av programmet. Dette var plassert under avdelinga for tillitsvalde. Dette har me fått negative tilbakemeldingar på, våre medlemmer fann oss ikkje i programmet for Veterinærdagane. Me må verta flinkare til å gjera oss synlege, slik at fleir kan finna det interessant å møta opp.

Årets programinnslag var todelt. Fyrst var Erik Stenvik med oss direkte på nett. Han fortalde om boka si Bondevett og las frå boka. Spennande betraktningar som mange kjende seg att i.

Del to var det Helene Seljenes Dalum som hadde ansvaret for. Ho hadde gått gjennom materialet sitt om psykisk helse hos veterinærar og sett særleg på det som gjaldt pensjonistar og eldre kollegaer. Interessant og tankevekkande. Ho har skrive ein artikkel om det same, denne finn ein i
NVT nr 1-2026 side 24.

I tillegg til vår del av programmet, er Veterinærdagane eit fint høve til å treffa gamle og nye kollegaer i triveleg lag. Dei mange utstillarane har og mykje å visa fram, kjekt å sjå korleis faget vårt utviklar seg.

Av andre ting me arbeidar med, må revisjonen av Dyrehelsepersonellova nemnast. Me fekk støtte for kravet vårt om livsvarig autorisasjon på siste Representantskapsmøtet i DNV. Aldersgrensa på 75 år er fastlagt i lova, det er ingen som kan endra på dette utan at lova vert endra. Landbruks- og matdepartementet har varsla at dei vil starta opp ein full gjennomgang av lova, dette arbeidet må me prøva påverka. Me vil ha livsvarig autorisasjon, men me må passa på at me ikkje vert pålagd hjelpeplikt med meir som går utover det me har i dag. Dei som ynskjer det, må få arbeida lengre. Men det må og vera slik at dei som ynskjer det, kan trekkja seg tilbake utan å ha plikter hengande over seg.

Me har på vår aktivitetsplan at me skal vitja minst tre lokalforeiningar kvart år. Til no har me vore med på kurs- og årsmøtesamlingar i Nordland, Opplandene og Møre- og Romsdal lokalforeiningar. Det har vore vellukka samlingar der me som pensjonistar har hatt eigne opplegg samstundes som me har vore med på den sosiale delen saman med resten. Me har og kunna vera med på årsmøte i lokalforeininga.

Den beste måten me som styre kan få vita kva de som medlemmer ynskjer me skal arbeida med, er å møta dåke direkte. Me ynskjer difor fleir slike samlingar, og har sendt brev til alle lokalforeiningsstyra og bede om å få koma. Dersom du ynskjer at me skal koma til din lokalforeining, ta gjerne kontakt med ditt lokale styre og spør om dei kan kontakta oss.

Dette er litt av det som vert arbeidd med i DNV-P. Har du tankar om ting me skal ta opp, ring eller send nokre ord. Det er den måten både me og foreininga kan verta betre på.